बडादशैंको अन्तिम दिन आज पूर्णिमा, अर्घा भगवती मन्दिरमा सराय नाच हुँदै
काठमाडौँ । नेपालीले भव्यरुपमा मनाउने दुर्गा पक्ष अर्थात् बडादसैँ पर्व धन धान्य एवं सम्पन्नताकी देवी महालक्ष्मीको पूजा आराधना सहित रात्रिमा जाग्राम बसेपछि आजदेखि समापन हुँदैछ । आश्विन शुक्ल पूर्णिमाका दिन मनाइने कोजाग्रत पूर्णिमा आज साँझ सम्पन्नताकी देवी महालक्ष्मीको पूजा आराधना गरी रातभर जाग्राम बसेर मनाएसँगै १५ दिन लामो बडा दसैँ पर्व समापन हुन्छ ।
शास्त्र अनुसार गर्नुपर्ने सबै बलिपूर्ति अर्थात् अखिल बलिपूर्तिको काम भने शुक्रबार नै समापन भएको नेपाल पञ्चाङ्ग निर्णायक विकास समितिले जनाएको छ । अखिल बलिपूर्ति भएसँगै विजयादशमीदेखि सुरु भएको नवदुर्गाको प्रसादस्वरुप टीका र जमरा लगाई मान्यजनबाट आशीर्वाद लिने क्रम पनि शुक्रबार नै समाप्त हो । शुक्रबार नै जमरालाई नजिकको नदी, तलाउ, पोखरी आदि पवित्र तीर्थस्थलमा लगी सेलाइएको छ ।यस्तै अर्घाखाँचीको अर्घा र भण्डारथुम लगायतका क्षेत्रमा पूर्णिमाकै दिन अर्थात आज सराय नाच र मेला लाग्ने गर्दछ । अर्घा भगवती मन्दिरमा बिहानैदेखि भक्तजनको भिड लागेको मन्दिर व्यवस्थापन समितिले जनाएको छ । विधिवत रुपमा अर्घा भगवती मन्दिरमा पुजा गरि यस वर्षको सराय नाच पनि आजबाट समापन हुन्छ ।
कमेन्ट गर्नुहोस !