‘हाँस्दै मलामी र रुँदै जन्ती जाने पात्र’

नेपाल कम्युनिस्ट पार्टी प्रचण्ड–नेपाल समूहका अध्यक्ष पुष्पकमल दाहाल ‘प्रचण्ड’ले केपी ओलीलाई जनताले प्रधानमन्त्री बनाएको नभई पार्टीले प्रधानमन्त्री बनाएको बताउनुभएको छ । उहाँले पार्टीको बहुमतको निर्णय मान्ने संसारभरको प्रचलन रहे पनि ओलीले पार्टीको बैठकबाट भागेर संसद् विघटन गरेको बताउनुभयो । उहाँले ओलीले जनतालाई प्राथमिकतामा राख्नुको सट्टा भ्रष्टाचारीलाई संरक्षण गरेको आरोप पनि लगाउनुभयो ।

पार्टी एकता गर्दा समाजवादको पूर्वाधार निर्माण गर्नेतर्फ अघि बढ्ने भनिएको भए पनि प्रधानमन्त्री ओलीले सरकारको नीति, कार्यक्रम तथा बजेटको विषयमा पार्टी कमिटीमा छलफल नगरेको समाजवादोन्मुख बजेट ल्याउन नसकेको प्रचण्डले बताउनुभयो । उहाँले भन्नुभयो– ‘ओली प्रवृत्तिविरुद्ध मेजर अपरेसन आवश्यक रहेको छ ।’

आवेग र आक्रोशसहित आन्दोलनमा सक्रिय हुन युवाहरुलाई निर्देशन दिँदै प्रचण्डले आन्दोलनकै जगबाट असंवैधानिक संसद् विघटन फिर्ता हुने बताउनुभयो । आइतबार पार्टी केन्द्रीय कार्यालय पेरिस डाँडामा राष्ट्रिय युवा संघ नेपालको केन्द्रीय कमिटीको दोस्रो पूर्ण बैठकमा सम्बोधन गर्दै अध्यक्ष प्रचण्डले आन्दोलनमा युवाहरु मात्रै नभई अग्रमोर्चामा आफू पनि सहभागी हुने घोषणा गर्नुभयो ।

कम्युनिस्ट आन्दोलनको एकताको प्रतिनिधित्व गर्न चाहेको बताउँदै आफूहरु माक्र्सवादप्रति निष्ठावान हुँदै इमानदार भएर अघि बढ्ने बताउनुभयो । प्रचण्डले देश रोएका बेला प्रधानमन्त्री केपी शर्मा ओली हाँसेर बसेको बताउनुभयो । ‘केपी ओली मलामी जाने बेलामा हाँस्दै हिँड्नुभएको छ । जन्ती जाने बेलामा रुँदै हिँड्नुहुन्छ, देश बरबाद भइरहेको छ । डढेलो लागेको छ । तर ओलीजी हाँसिरहनुभएको छ । नाङ्गै भएर पनि हाँस्नुहुन्छ।’ –उहाँले भन्नुभयो ।

शनिबार प्रदेश १ को भेलालाई सम्बोधन गर्दै ओलीले आफूले जनतालाई हँसाउन खोज्दा प्रचण्ड–नेपाललाई पीर परेको भन्दै कटाक्ष गर्नुभएको थियो । प्रचण्डले ओलीले प्रतिनिधिसभा विघटन गरेपछि देशका सबै जनता असंवैधानिक कदमको विपक्षमा रहेको दाबी गर्दै उहाँले संविधानमाथि निर्मम प्रहार भएकाले त्यसको प्रतिवादमा उत्रनुपरेको बताउनुभयो । ओली अझै बयलगाडाकै अवस्थामा रहेको टिप्पणी गर्दै प्रचण्डले ओली लोकतान्त्रिक हुनै नसक्ने बताउनुभयो । नेपाल समाचारपत्र बाट साभार

कमेन्ट गर्नुहोस !

यो समाचार पढेर तपाईलाई कस्तो लाग्यो ?

सम्बन्धित समाचार

Leave a Reply

Your email address will not be published. Required fields are marked *

Back to top button
Close
Close

Adblock Detected

Please consider supporting us by disabling your ad blocker